بغداد ایئرپورٹ سے 375 زائرین کو لے کر پرواز کراچی کے لیے روانہ ہو گئی، پرواز اب سے کچھ دیر پہلے روانہ ہوئی ہے۔
گورنر سندھ نے بتایا کہ انہوں نے عراقی سفیر سے بات کی تھی،عراقی سفیر نے یقین دہانی کرائی تھی کہ زائرین کو آج ہی واپس لایا جائےگا۔
گورنرسندھ نے بتایا کہ بغداد سے کراچی کیلئے روانہ پرواز صبح 5 بجکر 15 منٹ پر کراچی پہنچے گی۔
بغداد سے زائرین کو لیکر پاکستان آنے والی فلائٹ منسوخ ہو گئی تھی جس کی وجہ سے کئی زائرین بغداد ائیرپورٹ پر پھنس گئے تھے۔
بغداد ائیرپورٹ پر پاکستانی زائرین کے پھنے ہونے کے معاملے پر وفاقی وزیر مذہبی امور چوہدری سالک حسین نے عراق میں پاکستانی سفیرذیشان احمد سے رابطہ کیا اور بغداد ائیرپورٹ پر پھنسے پاکستانیوں کی بحفاظت واپسی یقینی بنانے کی ہدایت کی۔
پاکستانی سفیر ذیشان احمد کا کہنا تھا کہ صورتحال ٹؤرازم کمپنیوں کی بے انتظامی کے باعث پیدا ہوئی، ائیرپورٹ پر موجود زائرین کو کھانے سمیت دیگر سہولتیں فراہم کردی گئی ہیں۔
بغداد میں پاکستانی سفیر کا کہنا تھا کہ 350 زائرین آج رات کراچی پہنچ جائیں گے جبکہ جہاز واپس آکر باقی زائرین کو بھی آج صبح کراچی لے جائے گا، روانگی تک پاکستانی زائرین کی بنیادی ضروریات کا خیال رکھا جائے گا۔
دفتر خارجہ کا کہنا تھا کہ عراق ائیرویز کے دو طیاروں میں فنی خرابی کے سبب 654 پاکستانی زائرین بغداد ائیرپورٹ پرپھنس گئے ہیں۔
نائب وزیراعظم نے پاکستان کے سفیر کو کہا ہے کہ پھنسے ہوئے پاکستانیوں کی جلد وطن واپسی تک ان کی دیکھ بھال کریں۔
دوسری جانب قومی اسمبلی کے رکن حمید حسین نے گورنر سندھ سے اسلام آباد میں ملاقات کرکے بغداد ائیرپورٹ پر پھنسے زائرین کے مسائل حل کرنے پر بات چیت کی۔
گورنر سندھ کامران خان ٹیسوری نے عراقی سفیر اور دیگر اہم ذمہ داران سے فوری رابطہ کرلیا۔
عراقی سفیر کی جانب سے گورنر سندھ کو پاکستانی زائرین کو درپیش مسائل حل کرنے کی یقین دہانی کروائی گئی۔
گورنر سندھ کا کہنا تھا کہ بغداد سے 375 زائرین کو لے کر پہلی پرواز ایک گھنٹے بعد کراچی کیلئے روانہ ہوگی۔
انہوں نے بتایا کہ دو روز سے بغداد ائیرپورٹ پر پھنسے دیگر زائرین کو لانے کیلئے تاخیر کا شکار پروازوں کی جلد از جلد روانگی ممکن بنائی جا رہی ہے۔
