اسلام آباد: وزیر دفاع خواجہ آصف نے کہا ہےکہ تاثر اُبھر رہا ہےکہ اس وقت عدلیہ برسرپیکار ہے اور اُس میں سب سے بڑا مسئلہ بانی پی ٹی آئی کا ہے۔
جیو نیوز کے پروگرام آج شاہزیب خانزادہ کے ساتھ میں گفتگو کرتے ہوئے وزیردفاع خواجہ آصف نے کہا کہ تناؤ دن بدن بڑھ رہا ہے اور تاثراُبھر رہا ہےکہ اس وقت عدلیہ برسرپیکار ہے اور اُس میں سب سے بڑا مسئلہ بانی پی ٹی آئی کا ہے۔
انہوں نے کہا کہ عدلیہ سمجھتی ہے کہ بانی پی ٹی آئی کے کیسز میں ریلیف دیکر وہ موجودہ حکمرانوں کو مجبور کردیں گے کہ وہ ان کی شرائط پرصلح صفائی کرلیں۔
وزیر دفاع کا کہنا تھا کہ ہر ادارہ اپنے تحفظ کیلئے فصیلیں کھڑی کررہا ہے، اول و آخر دباؤ ہمارے اوپر ہے کیونکہ یہ منتخب حکومت ہی ہوتی ہے جس نے رخصت ہونا ہوتا ہے۔
