مسلم لیگ ن کے رہنما اور وزیراعظم کے سیاسی مشیر رانا ثنا اللہ نے انکشاف کیا ہے کہ محاذ آرائی کے خاتمے اور عدلیہ سے متعلق امور کے حل کیلئے مذاکرات شروع ہوگئے ہیں۔
جیو نیوز کے پروگرام نیا پاکستان میں بات کرتے ہوئے رانا ثنا اللہ نے کہا کہ وزیراعظم اور پوری پارٹی لیڈر شپ کو عدلیہ سے متعلق معاملات پر تشویش ہے، معاملے کو حل کرنے کے لیے جو کوششیں ہورہی ہیں، وہ منطقی انجام سے پہلے بلکہ منطقی انجام کے بعد بھی منظر عام پر نہیں آئیں گی۔
رانا ثنا اللہ نے کہا کہ ججز کا خط لکھنا کافی ہے کہ ایسا لائحہ عمل بن جائے کہ ادارے ایک دوسرے کی حدود میں مداخلت نہ کریں، موجودہ صورتحال کی بڑی وجہ بانی پی ٹی آئی کا مؤقف ہے کہ وہ سیاستدانوں کے ساتھ بات کرنے کو تیار نہیں۔
رانا ثنا اللہ کا کہنا تھا کہ ڈی جی آئی ایس پی آر نے کہا کہ سیاستدان آپس میں بات کریں ہم سے بات کرنے کا کیا تعلق، پی ٹی آئی حکومت میں ہم دو بار ملاقات کے لیے انتظار میں رہے ، بانی پی ٹی آئی اس طرح سے اپنا ،پارٹی اور ملک کا نقصان کر رہےہیں ،عمران خان چاہتے ہیں کہ پارلیمنٹ کے ذریعے انقلاب آئے، ٹاک شوز سے انقلاب آئے۔
انہوں نے کہا کہ موجودہ صورتحال سب کے لیے ہی درست نہیں ،ڈیڈلاک ختم کرنا چاہیے ، ہماری طرف سے کوئی انا یا ہٹ دھرمی نہیں، دوسری طرف سے ہے، ہم مذاکرات کی بات کریں تو وہ آگے سے گالیاں دیتے ہیں۔
رانا ثنا اللہ نے کہا کہ ہم نے عدلیہ کے خلاف محاذ نہیں کھولا، ریمارکس فیصلہ نہیں، ججز کو چاہیے فیصلہ کریں۔
ایک سوال پر رانا ثنا اللہ نے کہا کہ بانی پی ٹی آئی عمران خان جیسی نفرت انگیز سیاست کر رہے ہیں اس پر ان کے خلاف نئے کیسز بنیں نہ بنیں،ان کی حوصلہ شکنی ضرور ہونی چاہیے۔
