’آٹو بریوری سنڈروم‘: وہ نایاب مرض جس میں جسم خود بخود الکوحل بنا کر انسان کو نشے میں مبتلا کر دیتا ہے

’آٹو بریوری سنڈروم‘ نامی اس بیماری میں انسانی جسم میں الکوحل جیسا ایک کیمیکل ’ایتھنول‘ بڑی مقدار میں بنتا ہے۔

جنگلی حیات کے محکمے میں بطور ٹیکنیشن کام کرنے والے رے لیوس جب امریکہ کے شہر اوریگون کے ہسپتال میں بے ہوشی کی حالت سے بیدار ہوئے تو انھیں دو باتوں کا یقین تھا۔ پہلی بات تو یہ تھی کہ جس وقت ان کی گاڑی کو حادثہ پیش آیا تو اس وقت وہ 11,000 زندہ سالمن مچھلیوں سے لدا ایک ٹرک چلا رہے تھے۔

دوسری بات یہ کہ حادثے کے فوری بعد جب پولیس کی جانب سے اُن کے خون کے نمونے لیے گئے تو اُن کے خون میں الکوحل کی مقدار انتہائی زیادہ پائی گئی تھی۔

لیکن دلچسپ بات یہ ہے کہ دسمبر 2014 میں جب یہ حادثہ ہوا تو اُس رات انھوں نے شراب نہیں پی تھی۔

اب 54 سالہ رے اُس وقت کو یاد کرتے ہوئے کہتے ہیں کہ ’میں نے یقینی طور پر شراب کے ایک قطرے کو بھی ہاتھ نہیں لگایا تھا کیوں کہ میں جانتا تھا کہ میرے سامنے کورے سے اٹی ہوئی ایک سڑک اور اس پر چلانے کے لیے بڑا ٹرک تھا جس پر مُجھے دو گھنٹے کا سفر کرنا تھا۔‘

اس حادثے کے آٹھ ماہ کے بعد ہونے والے ایک طبی معائنے میں معلوم ہوا کہ رے کو ’آٹو بریوری سنڈروم‘ کا سامنا ہے یعنی ایسی حالت جس میں ان کا جسم خود سے الکوحل بنا پر انھیں نشے میں مبتلا کر دیتا ہے۔

(امریکی ٹی وی چینل فاکس 13 سیئٹل کی ایک سوشل میڈیا پوسٹ میں 2014 میں رے کو جس حادثے کا سامنا کرنا پڑا اُس کے مناظر دکھائے گئے۔)

اے بی ایس یا گٹ فرمنٹیشن سنڈروم (جی ایف ایس) ایک بڑی حد تک پراسرار کیفیت یا حالت ہے جو خون میں الکوحل کی سطح کو بڑھاتی ہے اور اس کی وجہ سے انسانوں میں نشے کی علامات پیدا ہوتی ہیں، یعنی شراب نہ پینے کے باوجود مریض غنودگی محسوس کرتا ہے۔

یہ اُس وقت ہوتا ہے جب پیٹ میں آنت، پیشاب کے نظام یا منہ میں موجود ایک خاص بیکٹیریا کاربوہائیڈریٹس اور شکر کو الکوحل میں تبدیل کرنا شروع کرتا ہے، ایک ایسا عمل جسے ’انڈوجنس الکوحل پروڈکشن‘ کہا جاتا ہے۔

اس کیفیت کا شکار فرد بنا سوچے سمجھے کُچھ بھی اور کہیں بھی کہہ دیتا ہے، چلے تو یوں محسوس ہوتا ہے کہ جیسے وہ نشے میں ہے اور سب سے بڑھ کر اگر ایسا شخص بات کرے تو قریب کھڑے افراد کو اس کے منہ سے شراب کی بُو بھی آ سکتی ہے۔

اس مرض کے ابتدائی کیسز میں سے ایک 1940 کی دہائی میں سامنے آیا جب یوگنڈا کے ایک ہسپتال کے ڈاکٹروں نے برٹش میڈیکل جرنل میں ایک بچے کے پوسٹ مارٹم کے نتائج شائع کیے۔ مریض ایک پانچ سالہ بچہ تھا جس کی ہلاکت پیٹ کے پھٹ جانے کی وجہ سے ہوئی تھی اور پوسٹ مارٹم کے دوران اس کے پیٹ میں شدید اور ناقابلِ برداشت ’بدبو‘ آ رہی تھی۔۔۔ بلکُل ویسے ہی کہ جیسے شراب کا بہت زیادہ استعمال کیا گیا ہو۔‘

اے بی ایس ایک انتہائی نایاب بیماری ہے۔ امریکن جرنل آف گیسٹرو اینٹرولوجی میں 2021 میں شائع ہونے والی ایک تحقیق میں کہا گیا کہ امریکہ میں اس مرض کے 100 سے کم رجسٹرڈ واقعات ہیں، تاہم کُچھ ماہرین کا کہنا ہے کہ اے بی ایس کے کیسز رپورٹ ہی کم ہوئے ہیں۔

طبی ماہرین اب تک وضاحت سے یہ بات نہیں کہہ پائے ہیں کہ اے بی ایس کا حملہ انسانی جسم پر کیسے ہوتا ہے۔

انسانی جسم میں کھانے کو ہضم کرنے کے لیے معدے میں ایک خاص مقدار میں الکوحل پیدا ہوتی ہے لیکن زیادہ تر افراد میں اس الکوحل کے اثرات سامنے آنے سے قبل ہی یہ ایک خاص قدرتی عمل ’فرسٹ پاس میٹابولزم‘ کی مدد سے ختم ہو جاتی ہے۔

پرتگال سے تعلق رکھنے والے بائیو میڈیکل کنسلٹنٹ اور فرانزک ماہر ڈاکٹر ریکارڈو جارج ڈینس اولیویرا کا کہنا ہے کہ ’ہمارے جسم قدرتی طور پر الکوحل پیدا کرتے ہیں، لیکن اے بی ایس کا شکار کوئی بھی شخص اس کی زیادہ مقدار کی وجہ سے تب مُشکل میں پڑ جاتا ہے کہ جب پیدا ہونے والی الکوحل اُس کے خون میں شامل ہو جاتی ہے۔‘

’افسوس کی بات تو یہ ہے کہ عام طور پر لوگوں کو اُس وقت تک اس بات کا علم ہی نہیں ہوتا کہ وہ اے بی ایس کے مرض میں مبتلا ہیں جب تک کہ اُن سے کوئی بڑا جُرم نہ سرزد ہو جائے۔‘

ڈاکٹر ریکارڈو جارج ڈینس اولیویرا اے بی ایس کو ’پرفیکٹ میٹابولک سٹرام‘ یا ایک انتہائی خطرناک طوفان قرار دیتے ہیں، جس کا مطلب ہے کہ یہ ایک ہی وقت میں ہونے والی متعدد چیزوں سے شروع ہوتا ہے۔ ان کا استدلال ہے کہ پہلی وجہ اکثر ذیابیطس، موٹاپا ہوا کرتا ہے۔

دوسرا ان دواؤں سے متعلق ہے جو یہ مریض اکثر استعمال کرتے ہیں، اینٹی بائیوٹکس اور امیونوسپریسنٹس، جو آنتوں کو متاثر کر سکتی ہیں، اور صرف یہی نہیں بلکہ یہ ان اچھے جراثیموں کو بھی متاثر کرتی ہیں کہ جو ہماری آنتوں میں رہتے ہیں۔

جب ایک امریکی نرس جو کورڈیل اپنے خاندان کے لوگوں کے ساتھ رات کے کھانے کے دوران بے قابو ہو گئے وہ یہ سمجھنے سے بھی قاصر تھے کہ وہ کیا بول رہے ہیں، انھیں بس اپنی اس کیفیت کی وجہ یہ سمجھ میں آئی کہ انھوں نے بہت زیادہ کھانا کھایا ہے۔

لیکن اُس رات ڈنر کے بعد یہ معاملہ رُکا نہیں بلکہ پھر ٹیکساس کے ایک ہسپتال میں جہاں وہ کام کرتے تھے، اُن کے ایک ساتھی نے اُن پر شفٹ کے دوران نشے میں دھت ہونے کا الزام لگایا۔

75 سالہ کورڈیل یاد کرتے ہوئے کہتے ہیں کہ ’میری سانسوں میں شراب کی بُو تھی، لوگوں کا خیال تھا کہ میں شرابی ہوں۔‘

وہ کہتے ہیں کہ ’میں شرمندہ تھا کیونکہ میں ان لوگوں میں سے ایک تھا جو اپنا کام انتہائی ذمہ داری سے کرتے تھے اور کبھی بلا وجہ ایک دن بھی کام سے چھٹی نہیں کی تھی۔‘

کچھ عرصے تو اُن کی اہلیہ باربرا کو بھی شک تھا کہ وہ شراب نوشی کرنے لگے ہیں اور اکثر نشے کی حالت میں رہتے ہیں۔

ایک ساتھی نرس نے کہا کہ باربرا اپنے شوہر کو سمجھنے کی کوشش کر رہی تھیں۔ یہاں تک کہ انھوں نے گھر کی تلاشی اس غرض سے بھی لی کہ کہیں گھر میں شراب کی بوتلیں تو نہیں چھپائی گئیں، اور اگر گھر میں شراب کی کوئی بوتل تھی بھی تو انھوں نے اس بات پر بھی نظر رکھی کہ ان کے شوہر ان کا کتنا استعمال کرتے ہیں۔

وہ کہتی ہیں کہ ’مجھے پہلے جُو پر شک تھا، میں نے گھر میں موجود شراب کی بوتلوں پر نشانات بھی لگائے یہاں تک بھی ان کی نگرانی کی کہ کہیں ان میں سے شراب استعمال کر دینے کے بعد پانی تو نہیں ڈالا جاتا کہ کسی کو یہ نہ پتا چلے کے اس بوتل میں سے شراب استعمال کی گئی ہے۔‘

جو کا کہنا تھا کہ ’میری اس کیفیت نے مُجھے ذہنی طور پر انتہائی تکلیف میں مبتلا رکھا اور میں اپنے آپ سے بھی خوفزدہ رہنے لگا تھا۔‘

جُو کو پہلی بار علامات کا سامنا کرنے کے چار سال بعد 2010 میں اے بی ایس کی تشخیص ہوئی تھی۔ وہ ملازمت پر تو جاتے رہے مگر اس سے قبل انھیں روزانہ خون میں الکوحل کی موجودگی کے ٹیسٹ کروانے پڑے۔

اس تجربے نے باربرا کو آٹو بریوری سنڈروم ایڈووکیسی اینڈ ریسرچ نامی سپورٹ گروپ تلاش کرنے پر مجبور کیا، جس کے تقریبا 850 ارکان ہیں۔

وہ کہتی ہیں کہ ’ہم روزانہ کی بنیاد پر مریضوں سے سنتے ہیں کہ انھیں ڈاکٹروں کی جانب سے توجہ نہیں دی جا رہی۔‘

جو کا کہنا ہے کہ ’مُجھے متعدد مسائل کا سامنا کرنا پڑا مگر اب گزشتہ دس سال سے میں اس سب سے آزاد ہوں۔‘

اس مرض کی تشخیص کے لیے ڈاکٹر سب سے پہلے مریض کے نظام ہاضمہ کے بیکٹیریا پروفائل کا تجزیہ کرنے کے لیے لیبارٹری ٹیسٹ کر سکتے ہیں تاکہ یہ معلوم کیا جا سکے کہ آیا الکحل پیدا کرنے والے جراثیموں کی غیر معمولی موجودگی ہے یا نہیں۔

اس ضمن میں ڈاکٹر اکثر گلوکوز چیلنج ٹیسٹ کر سکتے ہیں جس میں مریض کو کاربوہائیڈریٹ سے بھرپور کھانا کھانے یا خالی پیٹ گلوکوز کھانے کے لیے کہا جاتا ہے۔ کچھ گھنٹوں کے بعد، اے بی ایس کے بغیر لوگوں کے خون میں الکوحل کی سطح تقریبا ناقابل شناخت ہو گی جبکہ اے بی ایس والے افراد میں اس کی سطح انتہائی بلند ہو گی۔

ڈاکٹر ڈینس اولیویرا کا کہنا ہے کہ اے بی ایس کو عام طور پر ادویات اور کم کاربوہائیڈریٹ والی غذا کے امتزاج کے ساتھ ساتھ آنتوں کے جراثیم کو منظم کرنے والے فوڈ سپلیمنٹس کے استعمال سے کنٹرول کیا جا سکتا ہے۔

اور یہ وہ تمام باتیں تھیں کہ جنھوں نے جُو کی مدد کی اور گذشتہ دس سال سے ان پر غنودگی طاری نہیں ہوئی۔

لیکن کم کارب والی غذا پر عمل کرنے کے باوجود رے اب بھی کچھ انتہائی کم نوعیت کے اثرات کے ساتھ ان مرض سے لڑ رہے ہیں۔

تاہم انھوں نے اب اپنی اس کیفیت سے لڑنے کے لیے ایک خاص ’میا‘ نامی کُتے کی مدد حاصل کی ہے۔

اس کتے کو رے کے جسم میں کیمیائی تبدیلیوں کو سونگھنے کی تربیت دی گئی ہے۔ جب اسے رے کے جسم میں ہونے والی کسی تبدیلی کا پتہ چلتا ہے، تو وہ اُن کے سامنے کھڑی ہوتی ہے اور غور سے گھورتی ہے۔

رے کہتے ہیں کہ ’میا سے پہلے، میں مشکل سے گھر سے باہر نکل پاتا تھا، کیوں کہ مجھے ڈر لگا رہتا تھا کہ میرے مرض کی وجہ سے میرے یا دوسروں کے ساتھ کچھ بُرا نہ ہو جائے۔‘

رے بتاتے ہیں کہ ’اُس حادثے میں جو بھی ہوا اس کی ذمہ داری جج نے اُن پر ہی ڈالی، کیونکہ ٹیسٹ کی رپورٹ کے مطابق میرے جسم میں الکوحل موجود تھا۔‘

انھوں نے کہا کہ ’مجھے ایک بیماری ہے تاہم عدالت کی جانب سے ہونے والے فیصلے کے باوجود میرے بس میں بس یہی ہے کہ میں اس مرض کے خلاف اپنی جنگ جاری رکھوں۔‘

لیکن انھوں نے امید نہیں چھوڑی، اور نہ ہی اپنی حسِ مزاح۔

وہ کہتے ہیں کہ ’بہت سے لوگ سوچتے ہیں کہ اے بی ایس کے مریضوں کو مفت میں ایک نشہ کرنے والے فرد کی جیسی آواز ملی ہے، لیکن مجھے یہ کہنے میں خوف محسوس ہوتا ہے کہ میں نے تو اس کا ہینگ اوور بھی دیکھا ہے۔‘